***** كان ياما كان *****
ليه الأماكن والمعالم
ووجوه كتير أتغيرت ...؟
ولّا ف الأصل أتمحت ...؟
والنفوس والضماير اتبدلت
على رصيف الزمن
ولّا أنا شايف الدنيا غلط
وملامحى هى اللى ضاعت
سقطت زى اوراق الشجر
ولّا الدنيا خريف وتخاريف
خلت قلوبنا قاسية وحجر
ولّا أنكتب علي الجبين
اشيل من الهموم جبال آنين
والحزن محفور فى العينين
والدموع ع الخدود متسرسبه
متسلسة عذاب وضلمة وآلم
ولا النخل مال وضهره انحنى
ولّا أنقطع بينا الوصال
ولّا أحتمال شكلى اتحفر
على جدران الحيطان
فى كل بيوت البلد
والأمل فى القلب مات
والحياة لحظة وساعات
ما بين ضحكة صفرا
على الشفايف متزوقة
ودموع حزينة وفراق وبكا
وكتير بتألمنا حاجات
الحزن يعشش فى قلوبنا سنين
ويموت فى لحظة الحنين
والفرحة تمر فى ثوانى
وقلب يمكن يحب بجد
والف غيره حاقد أنانى
وبعد م كان زمان
في الف سكة للامل
والف غيرها للأمانى
تتوهنا السنين والليالى
ونعيش حياتنا متغربين
عن بعضنا واحنا بين أهلنا
للأسف بقينا نتقابل صدفة
وساعات بننسى أسامينا
ونرجع نحكى لبعضينا
ونقول كان ياما كان ...
فاكرين زمان
وأيام زمان
وناس زمان
ضاعت خلاص
راحت عدم ...
ونحكى بحرقة وندم
***************************
بقلمى / الشاعر سيد الأبنوبى
حقوق الملكية والنشر محفوظة
تعليقات
إرسال تعليق